POETRY 

Tenk Yu Beri Mats 

NI E. SAN JUAN, JR.
Posted by Bulatlat.com

Nang manalo si Patricia Evangelista sa English-Speaking Union kontest

Nagdiwang ang barkada ng mga elitistang patakbuhing sipsip sa padrino

Biro mo, pers prays sa pag-ayaw sa “blond and blue eyes”—di biro ‘yan

Tayong kasama sa 8 milyong diyaspora—dapat daw magselebreyt din

Bakit kung wala namang diperensiya kung saan ka nanggaling o tutungo

“Borderless world” na raw kaya dini o doon/abrod o “at home” pareho lang iyan

                                                Tenk yu beri mats!

Kahit saan ka naroroon, sabi mo, nasa ‘Pinas ka pa rin  nagpapalamig sa Jollibee

Sakay lang sa eruplano’t nasa Roma  Los Angeles  Tokyo Baghdad ka na

Sabagay di engineer o nars kundi d.h. “mail-order bride” o sinindikatong puta

Umalis ka man o hindi, pasok o labas, migrante’y lumubog-lumutang kung suwerte

Nasa Payatas ka man ang Lea Salonga’y puwedeng maging Miss Saigon

Puwedeng maging nars ang doktor o domestik ang titser salamat sa globalisasyon

                                                Tenk yu beri mats!

Pero Inday, libre na bang lahat sa supermall? wala nang uri o paghahati-hati?

Halu-halo na ba ang mga puting burgesya sa UK Europa at Norte Amerika?

Paano ang mga “homeless” mga bilanggo mga beteranong Pinoy na nalimutan na?

Pagdating mo sa “melting pot” idilat mo lang ang singkit mong mata

Bida mo’y haluan kang “hybrid” Kastila’t Intsik--  tatak mestisang Pinay pa rin!

Lumingon sa pinanggalingan para maibukod sa iba pero walang dilihensiya doon

                                                Tenk yu beri mats!

Kongratyulasyon at salamat sa mga puting nag-patronays sa pabonggang promo

Siguradong may “offer” ka na sapagkat kailangan ng burgesya ang ilusyong ito

Tutal sa bayan ng kurakot at trapo, napakamura’t bulgar na ang nasyonalismo 

Uuwi ka pa ba e bakit pa kung wala namang diperensiya--nakalimutan mo na ba?

Kahit polluted na’t nagbabaha ‘white X’mas” pa rin sa bakuran kapag Pasko

Kahit maniwala sa sabi, walang bait sa sarili, di bale basta may pera’t premyo

                                                Tenk yu beri mats!

Mabuhay ka, Patricia, balikbayan ka na rin pero hanggang dito na lamang ba tayo?

“Bagong bayani” ng imperyong bumitay kina Flor Contemplacion  Maricris Sioson

Yumari ng preso sa Guantanamo, namalimos kay Bush, naglinis sa Abu Ghraib

                                                Tenk yu beri mats!

Back to top

We want to know what you think of this article.