Missing

Ni FAYE SAGUN
Bulatlat.com

Ipagtutulos kita ng kandila,
aalayan ng sanlaksang tula,
didiligin yaring uhaw na lupa
ng tinipong dalamhati’t luha.

Ngunit tila kami mga kaluluwang
naghahanap ng puntod na nawawala:
walang misa,
walang kandila,
walang krus na pananda,
WALANG HUSTISYA!

Mga kaluluwang ligaw kami
na sa dilim ay humihikbi,
umaasam ng kaunting liwanag
upang maaninag katawang hinahanap.

Ipagtutulos sana kita ng kandila.
Aalayan sana kita ng mga tula.
Aawitan.
Iiyakan.

Ngunit saan?

Tinangay ng nagluluksang hangin
ang iginuhit mong pangalan;
Naiwala sa lawak ng karimlan
pati maayos sanang libingan.

Saan nga ba kita aalalahanin
sa ganitong araw ng pagdadalamhati?

Wala.

Wala, Kasama.

Liban sa mga papel na idinikit
sa mga poste’t pader na nanlilimahid.