Bato sa EDSA

Ni RAYMUND B. VILLANUEVA
Bulatlat.com

Magandang gabi, Pilipinas
Dumaan ang araw na walang demolisyon
Ngunit nagsunog na naman
Ng mga barong-barong
Sa gilid ng Trinoma
Kanina.
Samantala
Walang katigil-tigil ang paninisi
Ng mga burgis sa mahihirap.
Kawawang mga yagit, walang pang-Facebook
Para maipagtanggol ang sarili.
Di ko mawari bakit
Kung paanong nauwi sa murang cellphone
Ang isyu ng demolisyon.
“Basta iskwater, tiyak isnatser.”
Nakalimutan na si politiko
At holdapan sa gubyerno.
A, basta!
May silbi pa rin naman
‘Yang mga tibag na semento
sa tabi ng kalsada.
Pag dumating uli sila
Pagsikat ng umaga
Muling lilipad
Ang mga bato sa EDSA.