Gadangkal ang Bakas ni Ama sa Lupang Hinirang

NI RAUL FUNILAS
Inilathala ng Bulatlat
Vol. VII, No. 21, July 1-7, 2007

Gadangkal ang bakas ng kay amang yapak
Sa Lupang Hinirang na kanyang lupain.
May patak ng ulang gusto n’yang habulin
Kaya nagpapawis ang balat-balagat.

Gadangkal sa bukot ang butil panghasik
Na kanyang inipon noong katag-araw.
Gustong maibabad sa bakas-kalabaw
Upang mamalumpong sa libis ng bukid.

Subalit kaagaw ang buwitre’t tabon
Na laging panakaw ang pananalasa.
Biglaang umalsa’t aldabis ang taga:
“Ako’y maghahanda! At ito’ng panahong

Dapat makinabang sa lupang minana
Ang milyon kong anak na nangagdurusa.”

Hunyo 25, 2007

Inilathala ng(Bulatlat.com)