Hinagpis Ng Isang Bayani

By Paulino O. Pruel

Kay sarap pakinggan
Tagos sa puso’t isipan
Tawag sa iyo Bayani ng bayan
Sa panahong kasalukuyan

Hinahangaan sa iyong katatagan
Nilisan mo ang sariling bayan
Hanap ay magandang kapalaran
Sa ibayong dagat makikipagsapalaran

Lungkot sa pamilya handang labanan
Haharapin anumang kagipitan
Makamit lamang magandang kinabukasan
Kapalit ay lumbay at kalungkutan

Ang sobrang pagod sa maghapon
Buti-butil na pawis sa katawan
Sigaw at pasakit ng among pinaglilingkuran
‘Di alintana dahil sa mga mahal sa buhay

Hanggang kailan ang pagtitiis mo, kabayan
Na kayanin ang lahat ng iyong paghihirap
Sa kuko ng abusadong amo, ika’y sinasaktan
Sa araw at gabi sadsad ka sa kapaguran?

Dagdag-pasakit, buwanang sahod nabibitin
Minsan ginagawang ATM, after three months
O ‘di kaya pagkatapos ng anim na buwan
Wala kang magawa kundi ang tanggapin

Sinubok mong isumbong ang iyong kalagayan
Sa Konsolada’t Embahada ng ating pamahalaan
Pinangakuan ka ng tulong kaya naghihintay
Pero pangako’y hindi pa natutupad

Tanong mo sa sarili, Bayani nga ba ako kabayan?
Ganito ba inaalagaan ng ating pamahalaan
Ang kapakanan ng mga manggagawa sa ibayong dagat
O sadyang tayo ay tuluyan nang nakaligtaan?

-Paulino Pruel
Riyadh City/KSA

(Bulatlat.com)